LA MADONNA DEI MANDARINI

Quanno n cielo n angiulillo

nun fa chello c'ha da fà,

o Signore int'a na cella scura

scura o' fa nzerrà.

Pò se vota a n'ato e dice :

FA VENI' SAN PIETRO CCA'!!!

E San Pietro cumparisce :

Neh,Signò,che nuvità?

Dint a na cella scura scura

n' angiulillo sta nzerrato:

miettammillo a pane ed acqua

pecchè ha fatto nu peccato!

E San Pietro acala a' capa

E Risponne : SISSIGNORE!!!

Dice Dio : Ma statt'attiento

c'ha da stà vintiquatt'ore!!

L'Angiulillo da llà dinto

fa sentì tanta tanta lamiente .....

Meh,Signò, dice San Pietro,

pè sta vota... nun fa niente.

Nonzignore! Accussì voglio!

Statte zitto! Dice Dio :

Si no ognuno se ne piglia!

N' Paraviso cumann'io!!!

E San Pietro avota ' e spalle.

Dalla cella scura scura

l'angiulillo chiagne e sbatte

dice 'è metterse paura!

Ma a' Madonna , quanno ognuno

sta durmenno a suonne chine,

annascuso ' e tutte quante

và e lle porta ' e mandarine.

FERDINANDO RUSSO

-------------------------------------------------------------------------------------------------------

oggi scrivo io